Ana xolos! Toshkent shahar hokimiyatiga tegishli avtomobil 7 marta qizil chiroqni pisand qilmadi
O‘zbekiston Respublikasi Ichki ishlar vazirligi yo‘llarda eng ko‘p qoida buzayotgan avtomobillar bilan bog‘liq ma’lumotlarni oshkor etib, ularni beshtalik reyting asosida taqdim etdi.
Bu galgi “reyting”da poytaxtimizning Chilonzor tumanida joylashgan “Gold Air Travel” mas’uliyati cheklangan jamiyatiga qarashli Malibu rusumli, davlat raqam belgisi 01 216 WDA bo‘lgan transport vositasi haydovchisi “G‘olib” deb topildi. U o‘z boshqaruvidagi avtomashinada ko‘p emas, oz emas – jami 17 marotaba yo‘l harakati qoidalarini buzishga “jazm” etdi. Ushbu qoidabuzarliklarning 16 tasi belgilangan harakatlanish tezligi talablariga bo‘ysunmaslik, 1 tasi svetoforning taqiqlovchi ishorasida marakatlanish holatlaridir. Tabiiyki, qoidabuzarliklar uchun jarimalar miqdori ham “salmoqli” bo‘ldi – 8 million 87 ming 850 so‘m!
“Ikkinchi o‘rin”ni Yunusobod tumanidagi “Bilol Myagkaya krovlya” korxonasiga tegishli Lacetti rusumli (davlat raqam belgisi 01 305 YDA) avtomashina haydovchisi “egalladi”. U qoidabuzarliklari tufayli 13 marta kuzatuv kameralariga tushgan. Jumladan, manzilga judayam oshiqqan shekilli, 11 marta tezlikni belgilangan me’yordan oshirgan, 2 martasida svetoforning taqiqlovchi ishorasiga bo‘ysunishni xohlamagan. Umumiy jarima miqdori esa 2 million 845 ming 725 so‘mni tashkil etgan.
Toshkent shahar hokimligining Ma’muriy binolardan foydalanish direksiyasiga tegishli Epica rusumli avtoulov haydovchisiga ham sovrinli o‘rin “nasib” etdi. Haydovchi davlat raqam belgisi 01 206 TVA bo‘lgan mazkur transport vositasini boshqarayotib, “bor-yo‘g‘i” 12 marotaba yo‘l harakati qoidalarini buzdi va shubhasiz videokameralar nigohidan chetda qolmadi. Aytgancha, Epica haydovchisi svetoforning taqiqlovchi ishorasini xush ko‘rmaydiyov. Aks holda, chorrahalarda 7 marta “qizil”da o‘tmasdi.
Uchinchi o‘rin “sohibi” endi qayd etilgan qoidabuzarliklar uchun 2 million 845 ming 725 so‘m miqdorida jarima to‘laydi. Olmazor tumanidagi “Orange taxi” mas’uliyati cheklangan jamiyatiga qarashli Nexia rusumli (davlat raqam belgisi 01 270 TTS) avtomobil haydovchisi “reyting”ning keyingi o‘rnini band etdi. Negaki, “ko‘rsatkichlari” yomon emas – u kuzatuv kameralari ishga tushganidan buyon 11 marta qoidabuzarliklarni sodir etgan. Bunday “natija”ga erishish oson bo‘lmasa kerak, nima dedingiz...
Darvoqe, yuqoridagi qoidabuzarliklar uchun jarimalar miqdori – 2 million 96 ming 850 so‘m.
Va nihoyat, so‘nggi – beshinchi o‘rin “sohibi” bilan tanishing. Sergeli tumanida joylashgan mas’uliyati cheklangan jamiyat shaklidagi “Global Building Machinery” korxonasining Malibu rusumli (davlat raqam belgisi 01 077 VDA) avtomashinasi haydovchisi 9 marta kuzatuv kameralariga “suratga tushish” bilan ana shunday sharafga “muyassar” bo‘ldi. U shundan 8 martasida belgilangan tezlik talablariga amal qilmagan. Bir holatda esa svetoforning qizil chirog‘ini “ko‘rmay qolgan”. Unga 2 million 695 ming 950 so‘mlik jarima solingan.
Ana xolos! Toshkent shahar hokimiyatiga tegishli avtomobil 7 marta qizil chiroqni pisand qilmadi 
