Kamchiliklaringiz haqida o‘ylamang! Bu eng birinchi va muhim qoidalardan biri. Sizda bor muammolar boshqalarda yo‘q, deysizmi?!

Hech qachon, qanday vaziyat bo‘lishidan qat’i nazar qaddingizni egmang!! Egilib borganingiz sayin muammolar girdobiga cho‘kib ketaverasiz. Aksini qilsangiz, o‘z-o‘zidan yechimni ham topolasiz.

Tushkunlikka tushish?! U nima o‘zi? Bu sizning hayotdagi asosiy shioringizga aylanishi kerak. Har bir kundan zavqlanib yashang.

Tinglashni o‘rganing! O‘z fikringizni hech kimga uqtirmang. Shunday tinglovchi bo‘lingki, atrofingizdagilarning o‘zlari sizga talpinishsin.

O‘z iforingizni toping. Didingizga mos kelgan atirdan muntazam foydalaning.

Kimningdir nusxasiga aylanmang. O‘z uslubingizni toping. Dugonangizning kiyinishi, yurish-turishiga havas qilishingiz mumkin. Ammo xuddi uningdek bo‘lishga harakat qilmang.

Sumkangizda shirinlik olib yuring. Nega deysizmi? Ayrim vaziyatlarda tilni shirin qilishga to‘јri keladi. Ana shunda foydalanasiz. Bu ham diplomatiya usullaridan biri.

Qadamingizni o‘ylab bosing. Askarcha yurish sizga yarashmaydi. Hirom aylab yurishni o‘rganing. Toki sizni ko‘rganlar «Buni qanday uddalarkan» deb havas qilishsin.

Faqat o‘zingizniki bo‘lgan antiqa taom reseptini o‘rganing. Do‘stlar davrasi yoki mehmonlar jam bo‘lganda asqatadi. Shu bahona falonchining resepti degan nomga ham ega bo‘lasiz, bizning «Oshxonda mo‘’jizalar» tanlovimizda qatnashing.

Telefonda suhbatlashayotganda baland ovozda gapirmang. Atrofingizda hech kim bo‘lmasa ham baribir ehtiyotingizni qilganingiz ma’qul. Biror voqeani eshitsangiz, hissiyotlaringizni (ko‘z yosh masalan) yo‘lakdan o‘tib-ketib turganlarga ko‘rsatish shart emas.

Siz aktrisasiz! Kinoda bo‘lmasa ham, hayotda bosh rol faqat sizniki bo‘lishi kerak. Aktrisalarning asosiy ishi — rolni qoyilmaqom ijro etish.

Donoligingizni hadeb ko‘rasatavermang. Ayniqsa, erkaklar bilan suhbatlashganda. Kuchli jins vakillariga salgina yon bosib, bilmasvoylik qilish ham foyda beradi.

Manikyurga, albatta, e’tibor bering. Lak surtishga vaqt topilmasa, hech bo‘lmaganda tirnoqlarni tekislab turish lozim.

Labingizdan tabassum arimasin. Har qanday vaziyatda ham kulib turing. Shunda sizga nisbatan bo‘lgan hurmat, e’tibor va mehr ortib boradi.

O‘zingiz haqingizda kamroq gapiring. Odamlarni qiziqtirgan suhbatdosh bo‘lish uchun sirlilik foydadan holi emas.