O‘zbekistonlik taniqli milliarder Alisher Usmonovning marhum jiyani Bobur Usmonovning bevasi Diyora Usmonova 27 iyul kuni o‘g‘il farzandli bo‘ldi. Bu haqda Usmonovaning o‘zi bugun, 5 avgust kuni ijtimoiy tarmoqlardagi shaxsiy sahifasida xabar berdi.

Ko‘pchilikka ma’lumki, Alisher Usmonov dunyoning eng boy odamlari ro‘yxatidan o‘rin olgan. Milliarderning farzandi yo‘qligi uchun uning yolg‘iz ukasi Bahodir Usmonovning o‘g‘li Bobur Usmonov unga merosxo‘r sifatida ko‘rilgan. Alisher Usmonov ham uni o‘z o‘g‘lidek ko‘rgan.

2013 yil Usmonovlar oilasi uchun musibatli kechdi. 8 may kuni tonggi soat 5:15 da Bobur Usmonov va Kristina Yo‘ldosheva o‘tirgan Ford Mustang avtomobili Toshkentning Yunusobod tumanida, "Shedevr" supermarketi yaqinidagi qarama-qarshi yo‘llarni ajratib turuvchi to‘siqqa kelib uriladi. Natijada Bobur va Kristina voqea joyida halok bo‘ladi.

Bobur va Diyoraning 2012 yilda tug‘ilgan Maryam ismli qizi bor edi.

Bo‘lib o‘tgan voqealardan so‘ng Diyora Usmonova turmushga chiqqanini rasman e’lon qilmadi. U asosan Moskva, Istanbul va Dubay shaharlarida istiqomat qildi.

Diyora Usmonovaning ijtimoiy tarmoqqa joylashtirgan suratiga ko‘ra, u o‘g‘liga Ikrom deb ism qo‘ygan. U qo‘ygan suratda chaqaloqning familiyasiga ham ishora berilib, Ikrom Rahimov deb yozilgan.