Durdona To‘laganova va Munisa Rizayeva orasiga rahna solgan film - “Yo‘qotilgan jannat”
Bir nechta filmlari bilan tomoshabinlar nazariga tushgan kinorejissyor Durdona To‘laganova yana bir yangi film ustida ish olib bormoqda. “Yo‘qotilgan jannat” nomli mazkur kartina tez kunda katta ekranlarga chiqish arafasida. Melodramma janridagi kino asarning ssenariy muallifi hamda rejissyori Durdona To‘laganova. Tasvirchi Sherzod Umarov. Unda bosh rollarni Sitora Alimjanova, Sug‘diyona Azimova, Dj Yamin, Gulhumor Abdullayeva, Muyassar Berdiqulova va boshqalar ijro etgan. Ayni damda ijtimoiy tarmoqlar orqali katta qiziqish bildirilayotgan film kino ixlosmandlarini hayratlantira olishiga katta umid bog‘langan. Aprel oyida katta ekranlarga chiqishi kutilayotgan kartinaga xonanda Munisa Rizayeva saundtrek kuylagan.
Biroq ma’lumotlarga qaraganda, Munisa Rizayeva tayyor saundtrekdan voz kechgan va undan foydalanishni film rejissyori Durdona To‘laganovaga ta’qiqlab qo‘ygan. Uzoq yillardan buyon qadrdon bo‘lib, hamkorlikda ishlab kelgan bu ikki ijodkor o‘rtasida nima sababdan kelishmovchilik yuzaga kelgani noma’lumligicha qolmoqda. Durdona To‘laganovaning so‘zlariga qaraganda, yaqin orada kelishmovchilik bartaraf etiladi. Rejissyor Munisa Rizayeva bilan tushunmovchiliklarga chek qo‘yilganidan so‘ng saundtrek saytimiz orqali ommaga taqdim etilishini ham ma’lum qildi. Hozircha kuzatishda davom etamiz.