Rayhon fevral konsertlarini bu yil bahor oyiga surgan bo‘lsa-da, yangi xit qo‘shiqlar yaratishni unutganicha yo‘q. "Qani?” – u oilali bo‘lgach, ijodga yangi g‘ayrat bilan qaytganidan bir nishona. Ushbu sho‘x taronaga ayni kunlarda klip ham suratga olinmoqda.

-Klip muxlislarimga olam-olam quvonch baxsh etishiga umid qilaman. Kliplarimda ko‘plab aktyorlar, mashhur hamkasblarim rol ijro etishgan. "Qani?”da juda ko‘plab kino yulduzlari meni qo‘llab-quvvatlashdi. Ularga qanday qilib minnatdorchilik bildirishga hayronman. Har birining ijodiga va insoniyligiga ta’zimdaman! – deydi, Rayhon.

-Turmush o‘rtog‘ingiz ham klipda ko‘rinish beradimi?

-Albatta! Usiz klip bo‘ladimi? (kuladi).

Darvoqe, yana bir gap. Rayhon ijodiga navbatdagi hamla! U kuylagan "Bakabang”ni qaroqchi urdi. Qozoq kuychisi Sivi Mahmudi o‘z ona tilida "Bakabang”ni kuylab, hatto klip ham suratga oldirishga ulguribdi. (O‘tgan yili Ruslana "Yodingdami?”ni rus tilida kuylagandi!)

Ishqilib, hamma ijodkorlarga insof bersin. Ayrim paytda o‘zimiznikilardan ranjiymiz. O‘ylab qarasangiz, qaroqchilikni hamma qilyapti. Mualliflik huquqi bo‘yicha javobgarlik mayli bir tomon, hech bo‘lmasa "qaroqchi”lar haqiqiy ijodkorlar rasman ruxsat so‘rashsa, vijdonan toza yondoshgan bo‘lishardi!