Fuqaroni shaxsini aniqlash uchun ichki ishlar boʼlimiga olib borish amaliyotidan voz kechiladi
Hukumat qarori bilan ichki ishlar organlari patrulь-post xizmati saf boʼlinmalari xodimlari tomonidan jamoat joylarida fuqarolarni elektron identifikatsiya qilish tartibi toʼgʼrisidagi nizom tasdiqlandi.2023 yil 1 yanvardan “E-patrulь” tizimi bosqichma-bosqich joriy etiladi va fuqaroning shaxsini aniqlash uchun ichki ishlar boʼlimiga olib borish amaliyotidan voz kechiladi. Barcha maʼlumotlar elektron tekshiriladi va patrulь-post xodimi faoliyati “bodikamera”ga tasvirga olinadi.
Xodimlar quyidagi hollarda fuqaroni toʼxtatishi va shaxsini tasdiqlovchi hujjatlar yoki “E-patrul” tizimi orqali ularning shaxsini aniqlashi mumkin:
- shaxs jinoyat yoki huquqbuzarlik sodir etgan yoxud qidiruvda deb gumon qilishga asos boʼlsa;
- shaxsni sodir etilgan jinoyat yoki huquqbuzarlik haqida maʼlumotga ega deb hisoblash mumkin boʼlsa;
- shaxsni ushlab turishga boshqa qonuniy asoslar boʼlsa.
Xodim shaxsni toʼxtatganda uni toʼxtatganlik sabablari va asoslarini tushuntirishi shart. Yonida shaxsini tasdiqlovchi hujjati boʼlmagan fuqaro quyidagi hollarda ichki ishlar organiga olib boriladi:
- uning shaxsini planshet orqali aniqlash imkoni boʼlmaganda;
- qidiruvda boʼlgan yoki bedarak yoʼqolgan shaxslar aniqlanganda;
- shaxsiga aniqlik kiritish jarayonida qarshilik koʼrsatganda;
- jamoat joyida huquqbuzarlik sodir etish vaqtida ushlanganda.
Fuqaroni shaxsini aniqlash uchun ichki ishlar boʼlimiga olib borish amaliyotidan voz kechiladi 
