Go‘zal O‘tbosarova turmush o‘rtog‘ining so‘nggi kunini yodga oldi
O‘zbekiston xalq artisti, oliy toifali suxandon Abdumo‘min O‘tbosarovning rafiqasi Go‘zal O‘tbosarova Darakchi.uz saytiga bergan intervyusida turmush o‘rtog‘ining so‘nggi kuni haqida gapirib berdi.
“Bayram kuni hamma qatori, Abdumo‘min O‘tbosarovning oila a’zolari ham Yangi yilga o‘zgacha taraddud ko‘rishayotgandi. Biroq... 31 dekabr tongida “Bayram dasturini yozishimiz kerak. Ishimni tugatib qaytaman va bayram dasturxoni atrofida Yangi yilni jumul-jam bo‘lib kutamiz”, deb ishga ketgandilar”, - dedi u.
“Sog‘ligidan doim xabardor edim, sira yuragi bezovta qilganini aytmagan, - so‘zida davom etdi ayol. – Shunday bo‘lganida ham albatta, bu haqda bilgan va darhol chorasini ko‘rgan bo‘lardim. Chunki biror muammo yuz bersa, birinchi bo‘lib menga aytar, men bilan maslahatlashardilar. Oramizda sir yo‘q edi. O‘sha kuni tongda ishga kuzatganimcha, u kishini qaytib ko‘rmadim... O‘sha kuni televideniedan qo‘ng‘iroq qilib, “Abdumo‘min akani tobi qochib qolgani bois stasionarga olib ketishdi. Lekin siz xavotir olmang, ahvoli og‘ir emas”, deyishdi. Stasionarga yetib borsam, u yer qabul qilmagani uchun Toshkent tibbiyot akademiyasining reanimatsiya bo‘limiga yotkizishgan ekan. O‘sha yerda jon berdilarmi yo avvalroqmi buni bilolmadim...” deydi suxandonning rafiqasi”.
Eslatib o‘tamiz, Abdumo‘min O‘tbosarov yangi yilga o‘tar kechasi yurak xurujidan qazo qildi. Kun.uz ijodkorlari uning hamkasblari bilan videointervyu tayyorlab, o‘quvchilarga taqdim etgan edi.