Gollivud aktyori Jek Blekning o‘limi haqidagi xabar yolg‘on bo‘lib chiqdi
Kecha, 5 iyun kuni Gollivud aktyori Jek Blekning kutilmaganda vafot etgani haqida yolg‘on xabarlar tarqaldi, deb yozadi “Lenta.ru” nashri. Gap shundaki, aktyor ham chiqish qiladigan “Tenacious D” musiqiy guruhi a’zolarining Twitter ijtimoiy tarmog‘idagi sahifalarida aktyorning kutilmaganda vafot etgani haqida xabar qilindi.
OAV tomonidan aktyorning kutilmagan o‘limi borasida turli taxminlar paydo bo‘lib, deyarli barcha gazeta va jurnallarda, internet nashrlarida “o‘lim sababi” haqidagi maqolalar chop etila boshlandi. Bir nashrda Jekning tunda, uyquda, soat 3:37da vafot etgani aytilsa, ikkinchisida aktyorning atrofdagilarga noma’lum kasallik tufayli vafot etgani aytildi.
Biroq bir necha soatdan so‘ng, Twitter orqali “Tenacious D” musiqiy guruhi “Tinchlaning, do‘stlar! Bu shunchaki hazil, kameraga qarang. Afsona tirik va hammasi joyida”, deya ikkinchi xabarni qoldirdi.
Twitter foydalanuvchilari inson hayoti bilan bu tarzda hazil qilish yaxshilikka olib kelmasligini aytib, “Tenacious D” musiqiy guruhining ahmoqona hazilini qattiq tanqid ostiga olishdi.
Eslatib o‘tamiz, Jek Blek 1969 yilda tug‘ilgan. Ijodiy faoliyatini esa 80 yillarning boshida boshlagan. Gollivuddagi qator filmlarda, aksariyat hollarda esa komedik janrdagi filmlarda rol ijro etgan. Bular sirasiga “Rok maktabi”, “Omadsizlik askarlari”, “King Kong” kabi filmlarni kiritish mumkin. Bundan tashqari u “Kung-fu Panda”, “Muzlik davri” kabi multfilm qahramonlariga ovoz bergan.