Аввал хабар бериб ўтганимиздек Тошкентдаги муҳташам ресторанларнинг бирида пайшанба куни "Йил аёли" миллий танлови ғолибларини тақдирлаш маросими бўлиб ўтди. 

Бу йилги танловнинг дастлабки босқичида мамлакатимизнинг барча ҳудудларидаги илм-фан, маданият, таълим, соғлиқни сақлаш, тадбиркорлик соҳаларида самарали меҳнат қилаётган 30 минг нафардан ортиқ аёл иштирок этди. Мазкур танлов якунига кўра Қашқадарё вилояти Китоб туманидаги "Элдорбек Аброржон Луқмонович” фермер хўжалиги раҳбари Насиба Нурова ғолиб деб топилди ва "Матиз” автомашинаси билан тақдирланди.

Катта байрам руҳида ўтган мазкур маросимда шунингдек санъат усталари ҳам ўзларининг қўшиқлари билан иштирок этишди ва танлов қатнашчиларини рақсга чорлашди. 

Энг катта совғани эса танлов ташаббускори Гулнора Каримова тақдим этди. Шу куни йиғилганлар унинг нафақат серғайрат, ташаббускор, ғамхўр аёл эканини балки, ўзбек миллий қўшиқларига профессионал раққосалардек ажойиб рақс туша олиш санъатига ҳам гувоҳ бўлдилар. Бундан ташқари Гулнора Каримова Рашид Халиков билан ўзбек в рус тилларида иккита қўшиқ ҳам жро этди.