Men Iroda Nosirova .... yil 20 avgust kuni Toshkent shahrida dunyoga kelganman. Oilam haqida ko'p gapirishni yoqtirmayman. Aytishim mumkin bo'lganlari ota-onam, ukam va singlim bor. Ular bilan birga istiqomat qilaman. Toshkent shahridagi 287-o'rta maktabda tahsil oldim.

   Mening qo'shiqchilik borasidagi sahnadagi ilk qadamlarim maktab sahnasidan boshlangan, desam mubolag'a bo'lmaydi. Maktabda o'qib yurgan kezlarim "Ilhom chashmalari" va boshqa qo'shiq konkurslarida qatnashardim. Hatto "San'at g'unchalari" televizion ko'rsatuvida to'g'ridan-to'g'ri efirda Vatan haqida rosa hayajonlanib qo'shiq kuylaganman, bu adashmasam 1995 yil edi. Shu bilan birgalikda 8 yil davomida drama to'garagining qatnashchisi edim. Hatto ba'zilar ishonmasligi mumkin, Akmal Ikromov tumanidagi prezident archasida 2 yil davomida yalmog'iz kampir obrazini ijro etganman. Hullas maktabni tamomlab Pedagogika Unversitetiga o'qishga kirdim. O'zbek tili filologligi bo'yicha o'qib, jurnalist bo'lishni rejalashtirib qo'ygandim. Shu yilning o'zidayoq "Yoshlar" telekanalining "Davr" infotmatsion dasturiga ishga kirdim. Ushbu ko'rsatuvda 4 yil faoliyat yuritdim. Keyin bolalikdagi orzularim ustun keldi shekilli yana qo'shiq kuylash va kinoda suratga tushish istagi meni o'ziga torta boshladi. Hozirgacha 7ta filmda suratga tushdim. Qo'shiqchilik borasida esa ko'proq o'zim uchun kuylaganimdan uni jiddiy rivojlantirish haqida shu paytgacha o'ylamagan ekanman.

    Ismimni rahmatli buvijonim irodali bo'lsin deb qo'yganlar. Ismimga munosib bo'lishga harakat qilaman. Allohning qahridan va qorong'ulikdan qo'rqaman. Sofdil, sodda, oqko'ngil, haqgo'y va samimiy insonlarni yaxshi ko'raman. Bularning aksini yomon ko'raman. Qo'shiqchi bo'lmaganimda organ xodimi yoki sportchi bo'lardim. Sport turlaridan futbol va boksni yaxshi ko'raman. O'zim suzishga qatnashaman. Qizil, oq-qora, hullas yorqin ranglarga o'chman. Oshni va yapon sushisini haftada har kun yeyishga tayyorman. "Chanel", "Gucci", "Kasharel" atirlarini xush ko'raman.