Madridning "Real” klubi hujumchisi Krishtiano Ronaldo Ispaniya chempionatining 17-turida "Valensiya”ga qarshi o‘yinda (3:2) raqib darvozasiga to‘p kiritishga erishdi. Bu gol portugaliyalik "zambarak” uchun madridliklar safida La Liga bahslaridagi 164-si bo‘ldi. Bu haqda Sports.ru xabar bermoqda.

Shunday qilib, Ronaldo bu ko‘rsatkich bo‘yicha "Qirollik klubi”ning sobiq hujumchisi Ugo Sanchesga yetib oldi. 164 ta gol urish uchun Krishtianoga 151 ta uchrashuv yetarli bo‘ldi, o‘z navbatida meksikalik futbolchi (Ugo Sanches) uchun 207 ta bahsda maydonga tushish zarur bo‘lgandi.

Eslatib o‘tamiz, bu ro‘yxatning 1-pog‘onasini Raul Gonzalez egallab turibdi (228 ta gol), undan keyin Alfredo Di Stefano (216 ta gol) va Karlos Santiliyana (186 ta gol) bormoqda.