O'tkazilgan 1105 ta o'rganishning 102 ta holatida totalizator reklamasi aniqlangan.

O'zbekistonda 2021 yil totalizatorni reklama qiluvchi 30 dan ortiq sayt bloklandi. Bu haqda AOKAda o'tkazilgan brifingda Iste'molchilar huquqlarini himoya qilish agentligi matbuot kotibi Mohruxsor Tog'ayeva ma'lum qildi. 

Qayd etilishicha, 2021 yil 30 dan ortiq totalizator va bukmekerlik reklamasini noqonuniy ravishda yurituvchi saytlarga kirish cheklab qo'yildi. Bu sohadagi ishlar davom etayotgani ma'lum qilindi.

Shuningdek, o'tkazilgan 1105 ta o'rganishning 102 ta holatida totalizator reklamasi aniqlangan va ularning barchasi bartaraf etilgan. 

Ma'lum qilinishicha, agentlik tomonidan 2021 yil mobaynida 27 mingga yakin o'rganish o'tkazilgan. Shundan 15 ming 486 holatda turli kamchiliklar aniqlangan va ularni bartaraf etish choralari ko'rilgan.

Avvalroq O'zbekistonda totalizator va bukmekerlik faoliyatini reklama qilayotgan o'ndan ortiq saytga kirish cheklangani haqida xabar berilgandi.