Videoda bitta palatada bir necha bemor o‘z o‘rnida, yana bir guruh bemorlar esa oyoq ostida yotgani tasvirlangan.

Ijtimoiy tarmoqlarda Qashqadaryo viloyatidagi asab-ruhiy kasalliklar shifoxonasida bir guruh bemorlar joy yo‘qligi va shifokorlarning e’tiborsizligi tufayli polda yotgani tasvirlangan video tarqaldi. Viloyat SSB holat yuzasidan munosabat bildirdi.

Munosabatda keltirilishicha, ijtimoiy tarmoqlarda tarqalgan video 2022 yil 4 iyul kuni Kitob tumanidagi viloyat 2-asab-ruhiy kasalliklar dispanseri bolalar bo‘limida navbatchi sanitarka tomonidan tasvirga olingan.

2022 yil 5 iyul kuni dispanser jamoasining umumiy yig‘ilishida mazkur holat muhokoma qilinib, bemorlarning o‘z o‘rniga yotishini ta’minlamasdan, nazoratsiz qoldirgan 4 nafar xodimga mehnat qonunchiligiga asosan intizomiy chora ko‘rilgan. Yig‘ilishda bunday holat boshqa takrorlanmasligi bo‘yicha zarur choralar belgilangan.