Akbar Atamuhamedov Tramp va Shavkat Mirziyoyev siyosati o‘rtasidagi farqni e’tirof etdi
Sado» guruhi yakkaxoni Akbar Atamuhamedov o‘zining Instagram’dagi sahifasiga joylagan postida prezident Shavkat Mirziyoyevning qisqa vaqt ichida amalga oshirgan islohotlarini e’tirof etdi. «Amerikada Donald Trampning prezidentlik postidagi 100 kunlik faoliyati davomida amalga oshirgan ishlarini muhokama qilishmoqda. Migratsion siyosat, tibbiyot, Suriya va Shimoliy Koreyadagi tanazzul haqida gapirishmoqda. Trampning o‘zi esa natijalarini ancha ijobiy baholadi. Mening esa hayolimga birinchi bo‘lib bizning Prezidentimiz va analogik davrda uning amalga oshirgan ishlari keldi»,- deb yozadi xonanda postida. Akbar prezidentimiz amalga oshirgan islohotlarni birma-bir sanab o‘tgan. Ular orasida avval yopiq bo‘lgan yo‘llarning ochilishi va ta’mirlanishi, yangi metro bekatlarining qurilishi, virtual qabulxona va ishonch telefonlarining yo‘lga qo‘yilishi, «eski» sxema bo‘yicha ishlovchi qator mansabdor shaxslarning ishdan olinishi, yo‘llarda kameralarning o‘rnatilishi va natijada poytaxt haydovchilarining ancha tartibga solingani, fermer va dehqonlar uchun, urush qatnashchilari uchun yaratilgan qulayliklar, nihoyat Madaniyat vazirligining sportdan ajralgani va mahallarda obodonlashtirish ishlari qizg‘in olib borilayotganligi masalalarini e’tirof etgan.
«Shavkat Mirziyoyevning reytingi qanday ekanini bilmaymanu, ammo bugun yana saylov bo‘lganda biz yana boshqa nomzodlarga jiddiy e’tibor qaratmagan bo‘lardik»,- deb tugatgan xonanda fikrini.