Apple компанияси 23 октябрда iPad планшетининг кичрайтирилган нусхаси - iPad mini ни намойиш этди.
Планшет 7,9 дюйм – 20,07 сантиметрли экран билан жиҳозланган. Катта iPad билан солиштирганда, унинг экрани диагонали 9,7 дюйм – 24,64 сантиметрга тенгдир. Дисплей ўлчами худди iPad 2 каби 1024х768 нуқтага тенг. Бироқ экран ўлчами кичиклиги ҳисобига iPad mini пикселларининг зичлиги iPad 2 дан кўпроқдир – бир дюймга 163 нуқтани ташкил этади.
iPad mini қалинлиги – 7,2 миллиметрдир. У худди шу куни намойиш қилинган iPad нинг тўртинчи авлодидан ингичкароқ. Уяли алоқа модулисиз кичик планшет308 грамм вазнга эга бўлса, iPad нинг тўртинчи авлоди оғирлиги 652 граммга тенг.
Планшет Apple A5 икки ядроли процессорга асосланган. Унда иккита камера мавжуд бўлиб, орқа камера 5 мегапикселда суратга олади, олд томонидаги камера FaceTime HD деб аталади. Ускуна Lightning билан жиҳозланган. Планшет батареяси қуввати 9 соат тўхтовсиз ишлаш имкониятини беради.
Катта iPad каби iPad mini ҳам икки хил кўриниши ишлаб чиқарилади – уяли алоқа тизимларида ишлайдиган ва ишламайдиган планшетлар. Wi-Fi га эга ускуналар нархи 329 АҚШ долларидан бошланади. Wi-Fi ва уяли алоқа тизимларида ишловчи аппаратлар эса 459 доллардан бошланади. iPad mini планшетлари 2 ноябрда сотувга чиқарилади.
Apple iPad mini намойиш этди 
