AQShdagi auksionda «Hitlerning qo‘l soati» sotildi

Nemis natsistlari yetakchisiga tegishi ekani taxmin qilinayotgan aksessuar bir million dollardan ko‘proqqa sotildi. Auksion tashkilotchilari yahudiy tashkilotlari tomonidan keskin tanqidga uchradi.

Bir paytlar Adolf Hitlerga tegishli bo‘lgan qo‘l soati 28 iyul, payshanba kuni AQShning Merilend shtatidagi Alexander Historical Auctions auksion uyida 1,1 mln dollardan (1,08 million yevro) ko‘proqqa sotildi. Buyum oltin qutisiga burgut, svastika va nemis natsistlari yetakchisining bosh harflari o‘yib yozilgan. Lot boshlang‘ich narxidan ancha past sotildi: aksessuar uchun 2 milliondan 4 million dollargacha mablag‘ tushishi kutilgandi.

Kimoshdi savdosida natsistlar davriga oid yana bir qancha artefaktlar ham sotildi. Xususan, Alexander Historical Auctions auksion uyi sayti ma’lumotiga ko‘ra, Berlindagi reyxskanselyariyada joylashgan imperator burguti uchun 200 ming dollar to‘langan. Hitler Chexoslovakiyaning nemislar yashaydigan chegara hududlarini natsistlar Germaniyasiga qo‘shib olish to‘g‘risida 1938 yilda Myunhen bitimini imzolagani iddao etiladigan bronza byuvar (papka, portfel turi) 290 ming dollarga sotib olindi. 

Kimoshdi savdo uyi ma’lumotlariga ko‘ra, oltin soat Hitlerga 1933 yilda NSDAP a’zolari tomonidan sovg‘a qilingan. Ular 1945 yil 4 mayda - Hitler Berlinda o‘z joniga qasd qilganidan to‘rt kun o‘tib - Hitlerning Berxtesgadendagi sobiq Alp qarorgohida fransuz askari tomonidan topilgan. Soat bir necha o‘n yillar davomida askar oilasida bo‘lgani aytiladi.