Joriy yilning bahorida O'zbekiston va Rossiya
kinoijodkorlarining hamkorlikdagi mahsuloti — "Geolog. Ajaldan
kuchliroq" badiiy filmi ekranlarga chiqadi. "Podrobno.uz"
nashrining ta'kidlashicha, bu O'zbekiston uchun butkul yangicha kinoloyihadir:
yangi janr, yangicha operatorlik yondashuvi va maxsus effektlar. Eng asosiysi —
mutloq yangicha syujet.
Film voqealari o‘tgan asrning 60-yillarida Rossiyada bo‘lib
o‘tadi. Toshkentdagi oliy o‘quv yurti geologiya fakultetining ikki nafar
bitiruvchisi Novosibirskka amaliyotga borishadi. Ammo begona shaharga safar
chinakam sarguzashtga aylanib ketadi.
Qahramonlar mahalliy banditlarga duch kelishadi, otishma,
tovlamachilik, bo‘rilar izg‘igan zulmat o‘rmonda kezishlar… Voqealarning bu
qadar keskin burilishiga tayyor bo‘lmagan yosh amaliyotchilar mazkur murakkab
vaziyatda jon saqlab qolish uchun jon-jahdlari bilan harakat qilishadi.
Ijodiy guruh hozircha bu yangilikning ko‘p tafsilotlarini
oshkor etmayapti. Ma’lum bo‘lgani shuki, suratga olish jarayonlari
O‘zbekistonda va Rossiyaning Perm o‘lkasida kechgan. Unda o‘zbekistonlik va
rossiyalik aktyorlar jamoasi ishtirok etishgan. Shuningdek, "Geolog. Ajaldan
kuchliroq” kartinasi O‘zbekistonda Dolby Digital 5.1 ovoz formatidagi ilk
prodyuserlik loyihasi bo‘ladi.
Ta’kidlash kerakki, prodyuser Oybek Abdushukurov, loyiha
muallifi Muxlisa Azizova va rejissyor Dilmurod Masaidov keyingi yillarda o‘zbek
kinematografiyasi uchun odatiy bo‘lib borayotgan mavzular doirasidan dadil
chiqa olishgan. Ilk o‘zbek kriminal-sarguzasht filmining treyleri ham
allaqachon internetga chiqib ulgurdi. Facebook ijtimoiy tarmog‘ida ham filmning
sahifasi ochilgan bo‘lsa-da, unga hozircha hech qanday ma’lumot kiritilmagan.
Kartinaning premyerasi esa bahorda, Toshkent, Moskva va Nyu-Yorkda bo‘lib
o‘tadi.