22 май куни Алишер Навоий киносаройида премераси бўлиб ўтган «Мен юлдузман» фильми бугунги ўзбек кинобозоридаги энг шов - шувли фильмлардан бири бўлди десак хато бўлмайди.  Фильм тақдимотида даврани севимли актёрларимиздан бири Лутфулла Саъдуллаев олиб борди. Таништирув баъзи фильмларники каби  чўзилиб томошабинларни зериктириб қўйгани  йўқ. Қисқа ва лўнда таништирувдан сўнг, Улуғбек Қодировнинг илк бора фильм учун куйланган саунтрейк қўшиғи янгради. Қўшиқ ва саунтрейк чакки чиқмаган. Энг муҳими Улуғбекнинг мухлисларига хақиқий совға бўлди. Сўнгра фильм намойиш этилди. Премера кўтаринки кайфиятда ўтди. Сабаби фильмнинг юморга бойлиги томошабинларни асло зериктирмади. Айниқса Улуғбек Қодировнинг хеч бир юлдуз хонандаларимизни танимасдан "Мен Шахзодани севаман!” деган хазил гапига залдаги томошабинлар қарсак чалиб юборди. «Мажрух», «Ёндиради куйдиради» ва «Жодугар» фильмлари ижодкорлари томонидан суратга олинган ушбу  янги кинокомедия  комедик мелодрамма жанрида суратга олинди.

Ушбу фильмнинг сценарий муаллифи Акром Махкамов бўлиб, сиз бу ижодкорни  «Дада» ҳамда  «Ўзимдан ўзимгача» фильмлари орқали яхши танийсиз.   Фильмда бош ролларда: Улуғбек Қодиров, Зарина Низомуддинова, Отабек Махкамов, Хадича Имомназаровалар бош ролларни талқин этишган. Суратга олиш ишлари  Сўқок тоғларида бўлиб ўтди.  

"МЕН ЮЛДУЗМАН!”... Режиссёр бу билан томошабинларга нима демоқчи бўлди? Шуниси аниқки, фильмнинг мавзуси бугунги кунда эстрадамизда ва шоу бизнесдаги айрим "юлдуз” хонандаларимизга тегишли. Режиссёр фильм орқали кўпгина ёш хонанда қизларимизни камчиликларини, асл қиёфасини ва манманлик оқибатида  абгор ҳолатга тушиб қолишини маҳорат билан кўрсатиб беришга ҳаракат қилди.  Бугунги кундаги айрим эрка ва каландимоғ хонанда хонанда қизларимизни хеч аяб ўтирмай, ташқи хамда ички қиёфасини юмор орқали фош этди. Энг диққатга сазовор саҳналар жудаям кўп. Айниқса қишлоқ шароити фильмда маҳорат билан очиб берилган.

Қизиқ, фильм режиссёри кўпроқ қайси хонандадан бу қадар илҳомланган бўлиши мумкин? Фильм қаҳрамонинининг исми  - Лола! Хаёлингизда йилт этган илк фикрни билиб турибмиз. Лекин фикрингиз канчалик тўғри? Энг қизиғи фильм премерасига хонанда Лола ҳам ташриф буюрди. Ва фильмни томоша қилиш давомида фильм хонанда Лолага тегиб кетган бўлса керак деган хаёлда режиссёрга қўнғироқ қилсам аксинча биринчилардан бўлиб Лола ушбу фильм билан режиссёрни табриклаганини эшитиб хайрон қолдим. Хуллас, катта экранларда намойиш этилаётган ушбу энг шов - шувли фильмни биргаликда кузатишда давом этамиз. Ушбу фильм фильм режиссёрининг навбатдаги ютуқларидан бири бўлди десак ҳам янглишмаган бўламиз.