Ҳозир қайси қўшиқ ихлосмандидан "Кимнинг концертини соғингансиз?” деб сўраманг, ўйлаб ҳам ўтирмай, "Юлдуз Усмонованинг” дея жавоб беради. Бунга сабаблар етарли. Биринчидан, Усмонованинг бир неча йиллардан бери ўн кундан ошиқ бериб келган концертлари мухлислар ишончини қозонган, иккинчидан, юз фоиз жонли концерт тушунчасини айнан шу хонандагина шоу оламимизга олиб кирди. Учинчидан, Юлдузнинг йиллик ҳисоботи янгилик ва шов-шувларга бой бўлади: янги раққосалар, янги рақслар, фақат янги қўшиқлар, энг қиммат ва оригинал декорация, кутилмаган дуэт ва бошқалар. Ҳар йили "Апрел концертлари” таърифини олган Юлдузнинг яккахон дастурини юқоридаги асосий далиллар боис интиқ кутишарди. 2007 йилдан бери эса "Истиқлол” саҳнаси ҳам примадоннани соғинган десак, бўрттириш бўлмаса керак! Чунки, саҳна ҳам "ёнадиган, ёндирадиган” санъаткорларни қўмсаса керак-да! 5 йилдан бери Юлдузнинг ашаддий мухлислари унинг ўз Ватанида кўпроқ ижод қилишни истайди. Туркияда муваффақиятли ижод қилаётган хонанда юртимиздаги тўйларда жуда фаол. 5 йил ичида "олма пиш, оғзимга туш” демасдан, ижод отини қамчилаб, бир неча мусиқий альбомлар яратишга, ўнлаб турк шоуларида иштирок этишга ва Истамбулнинг энг йирик аренасида яккахон концерт беришга эришди. Шу кунларда эса мухлисларнинг дуоси ижобат бўлган кўринади. 6 март куни Усмонова Самарқанд шаҳрида яккахон концертини беради. Мўъжаз ресторанда бўлса-да, концерт файзи катта саҳналардагидан-да кам бўлмаслигига кафолат бор! Ахир, бу Юлдуз! Бундан бир неча ой олдин Навоий шаҳридаги бир ресторанда хонанданинг концерти ҳам бўлиб ўтганди. Бироқ, Самарқанддаги концертлари расмий равишда эълон қилинди. Демак, бу бошланиши! Агар, республика бўйлаб, шундай мўъжаз концертлар берилиши давом этар экан, куздан катта умид қилса ҳам бўлади. "Истиқлол” концертлари "жўжани кузда санаймиз” нақлига яхшига тасдиқ ҳам бўлар! Кутамиз ва яхши ниятлар билан кузатамиз!
НИҲОЯТ...ЮЛДУЗНИНГ КОНЦЕРТЛАРИГА РУХСАТ ТЕГДИ! 
