Noma’lum shaxslar Parij yaqinidagi do‘konda 18 kishini garovga oldi
13 iyul kuni Fransiya poytaxti Parij shahri yaqinidagi do‘konlardan biriga noma’lum shaxslar guruhi bostirib kirib, do‘kon ichida odamlarni garovga olgan holda o‘rnashib oldi. Bu haqda RIA Novosti nashri xabar bermoqda.
Xabarda aytilishicha, bu Quartz nomli savdo markazi hududidagi do‘kon ichida 18 nafar kishi garovga olingan. Ayni vaqtda hududni polisiya o‘rab olgan.
Aniqlik kiritilishicha, Vilnev-la-Garen shahridagi Primark do‘koniga mahalliy vaqt bilan soat 06:30 (Toshkent vaqti bilan 09:30)da hujum uyushtirilgan.
Frans Press agentligi ma’lumotlariga ko‘ra, do‘kon xodimlaridan biri o‘z telefonidan ikki nafar qurollangan shaxs do‘kon ichidagilarni garovga olgani haqida sms yuborgan.
Garovga oluvchilar o‘z asirlarining ozod etilishi evaziga qanday talablar qo‘yishayotganlari haqida aniq ma’lumotlar berilmagan. Agentlik xabariga ko‘ra, hujum qilganlar oddiy o‘g‘rilar hisoblanishadi.
Noma’lum shaxslar Parij yaqinidagi do‘konda 18 kishini garovga oldi 
