Noyabr oyida Oybek va Nigoraning nikoh to‘yi bo‘lib o‘tadi
2015 yilning noyabr oyida o‘zbek estrada vakillari, “Nihol” mukofoti sovrindorlari – Oybek Alimov hamda Nigora Ismoilovaning nikoh to‘yi bo‘lib o‘tadi. Bu haqda kun.uz saytining ishonchli axborot manbasi xabar qildi.
Axborot manbasining ma’lum qilishicha, ayni paytda yosh juftlik to‘y tayyorgarliklari bilan band. Ular birgalikda turli tashkiliy masalalarni hal etishmoqda.
Bundan avval ham ushbu juftlikning oila qurishi haqida ko‘p marotaba mish-mishlar tarqalgan bo‘lib, bu boradagi gaplar o‘z tasdig‘ini topmagan edi.
Mazkur masala yuzasidan san’atkorlarning ma’muriga qo‘ng‘iroq qilganimizda, bu bo‘yicha izoh bera olmasligini ma’lum qildi.
Xonandalar 2005 yildan buyon duet guruh sifatida hamkorlikda faoliyat olib bormoqda. 2008 yilda ular “Nihol” davlat mukofotini qo‘lga kiritishdi. Suratlar Oybek va Nigoraning "Instagram" ijtimoiy tarmog‘idagi sahifalaridan olindi.
Noyabr oyida Oybek va Nigoraning nikoh to‘yi bo‘lib o‘tadi 
