Germaniya shifokorlari o‘zbekistonlik 13 nafar bolani xayriya asosida operatsiya qiladi. Bolalarning Germaniyaga jo‘nab ketishi 12-fevralga belgilangan, deb xabar berdi "Turkiston press” nodavlat axborot agentligi.

Navbatdagi ijtimoiy aksiya Germaniyaning Friedensdorf International xalqaro tashkiloti va O‘zbekistonning "Sog‘lom avlod uchun” xalqaro hayriya jamg‘armasi hamkorligi doirasida tashkil etildi.

Ushbu hamkorlikning asosiy maqsadi ijtimoiy nochor tabaqa – kam ta’minlangan oilalar farzandlari, imkoniyati cheklangan va yetim bolalarga yordam berishdan iborat. Bu safar Germaniya klinikalariga Jizzax, Namangan, Navoiy, Samarqand, Surxondaryo, Farg‘ona va Xorazm viloyatlaridan bolalar jo‘natiladi.

16-fevralda Germaniya klinikalariga davolash uchun avval jo‘natilgan yetti nafar bola qaytib keladi.

2002-yilda "Sog‘lom avlod uchun” xalqaro xayriya jamg‘armasi va O‘zbеkiston Rеspublikasi Sog‘liqni saqlash vazirligi Gеrmaniyaning Friedensdorf International xalqaro tashkiloti bilan hamkorlik bitimi imzolagan edi. Ushbu xalqaro tashkilot 1967-yili tashkil topgan bo‘lib, bugungi kunda 35 dan ortiq davlatlar bilan o‘zaro hamkorlik qiladi. Tashkilotning asosiy vazifasi 12 yoshgacha bo‘lgan bеmor va nogiron bolalarni davolash hamda rеabilitatsiya qilishga yordam ko‘rsatishdan iborat.

2002–2014-yillar davomida Gеrmaniyaga 231 nafar o‘zbekistonlik bola davolanish uchun yuborildi.

Bundan tashqari, Friedensdorf International O‘zbekistonda tug‘ma jag‘-yuz defekti bilan tug‘ilgan bolalar operatsiyasini o‘tkazish uchun grant mablag‘i ajratgan. Grant hisobidan 2013-yilda 237 nafar bola operatsiya qilindi. Ushbu dasturning moliyaviy xarajati 26 million 750 ming so‘mni tashkil qildi.

"Chiroyli oyoqchalar” loyihasi doirasida o‘tgan yili tug‘ma oyoq nuqsoni bor deb tashxis qo‘yilgan 15 yoshgacha bo‘lgan 227 nafar bеmor bola ham operatsiya qilindi.