2014 йил турли мавзу, турли жанрдаги янгидан янги фильмларга бой. Улардан яна бири томошабинлар диққат эътиборини тортса ажаб эмас.

Элмира Хасанова сцераийси асосида, Фаррух Соипов режиссёрлигида суратга олинган "Нафс” номли фильмнинг премъераси 25 март куни бўлиб ўтади. "Шарқ Синема” студиясида ишлаб чиқарилган мазкур кинофильмда бош ролларни Фаррух Соипов, таниқли хонанда Шахзода,  Улуғбек Қодиров, Муниса Ризаевалар ижро этганлар. 

Эпизодик ролларда ҳам бир неча таниқли  юлдузларни кўришингиз мумкин. "Божалар” гуруҳи, Умид Искандаров, Шаҳзода Матчонова, Рухшона ва бошқаларнинг  қисқа бўлсада актёрлик маҳоратидан баҳраманд бўласиз. Шунингдек, мафтункор хонанда Шаҳзода бутунлай ўзгача образда намоён бўлади. Уни ўзгача кўринишда,  феъл-атворда кўришингиз мумкин. Унинг янгидан янги қирраларини кашф этишингиз шубҳасиз.

"Нафс”фильмни томоша қилиб, бойликка ружу қўйиш чинакам бахт олиб келмаслигини англаб етиш мумкин. Ҳар қандай вазиятда муҳими инсонларга хос гўзал фазилатлар сақланиб қолиши кераклигига яна бир карра ишонч ҳосил қиласиз. Ўзингиз учун керакли хулосалар чиқарасиз деган умиддамиз.

Фильм ҳақида қисқача:

Баланд тоғликларда яшаб, чўпонлик билан шуғулланувчи Абдураҳмон исмли йигитнинг эҳтимол кўзни қамаштирувчи чиройи, мол дунёси йўқдир, бироқ унинг оиласи, севимли рафиқаси бор. Абдураҳмон соатлаб севимли телевизорига тикилиб ўтириши мумкин. Унда намойиш этиладиган кинофильмлар, клиплар ва реклама роликлари чўпон йигитнинг эътиборини тортади ва кун сайин бутунлай бошқа ҳаёт орзусига берилади. У телевизорда кўрган таниқли юлдуз Самирга тақлид қила бошлайди. Кунлардан бир кун унинг нигоҳи телевизордаги гўзал қизга қадалади ва  у бир қарашданоқ ошиққа айланади.

Шунда: "Шу қизга эришиш учун қалбимни ҳам сотардим”, деб айтади. Ана шу сўзлар унинг ҳаётини буткул ўзгартириб юборади. Янги ҳаёт унинг руҳиятига қандай таҳсир кўрсатади? Абдураҳмон қандай синовларга дуч келади? Фильмни томоша қилиб, саволларингизга жавобни олишингиз мумкин.

Фильм ижодкорлари билан ҳам танишинг.

Продюсер: Аваз Таджиханов.

Сценарий муаллифи: Эльмира Хасанова.

Режиссер: Фаррух Соипов.

Оператор: Рустам Муродов.

Композитор: Шухрат Зокиров.