Бугундан эътиборан шаҳримиз кинотеатрларида "Нафс” фильмининг намойиши бошланди. Алишер Навоий номидаги кинотеатрида 25-март куни соат 15:00 да илк тақдимоти бўлган премьера сифатида тақдим этилган кинокартина йиғилган барча томошабинларни ҳам кулдирди, ҳам йиғлата олди. 

Зал киномухлислар билан тўлди. Фильмда бош ролларни мафтункор ҳонандамиз Шаҳзода, Муниса Ризаева, актёрлар Фаррух Соипов, Улуғбек Қодиров ижро этишган бўлса, шунингдек, бир қатор санъат вакиллари "Божалар” гуруҳи, Рухшона, Шаҳзода Матжонова, Умид Искандаров каби ижодкорларнинг ижроларидан ҳам баҳраманд бўлишингиз мумкин.

Айтиш керакки, картина кулгуга бой кадрларга бой. Ҳаётда учрайдиган воқеалар хазил-мутойиба орқали акс эттирилган. 

Фильмнинг ҳақиқий маликаси сифатида латофатли ва гўзал хонанда Шаҳзодани кўриш мумкин. Бу гал кўпчилик хонандани ўзгача қиёфада кўрди.

Тасаввур қиляпсизми, ҳамма нарсага қодир, истаган кишисиниг қиёфасига кира олувчи Шаҳзодани... Бир қарасангиз, Улуғбек Қодиров, бир қарасангиз бошқа бир инсон.

У фильмда чўпон йигитнинг орзуларини рўёбга чиқарган ва уни бошқариб турадиган сеҳргар образида намоён бўлади. Шаҳзоданинг актрисалик қобилиятига тан берган кўплаб томошабинлар хонандани яна бир очилмаган қиррасидан бохабар бўлишди. 

Улуғбек Қодиров ҳам ҳар доимгидек аъло даражада роль ижро этган. Шунингдек Фаррух Соиповнинг бош рольда иштирок этиши кўплаб мухлисларига манзур келди.

Эпизодларда роль ижро этган таниқли актёрлар Бобур Йўлдошев, Умид Искандаров, хонанда ва актёр Жаҳонгир Позилжоновлар ҳам чиройли чиқиш билан кадрларда муҳрланишган. Шунингдек фильмда яна кўплаб машҳурларни кўришингиз мумкин.