Lokomotiv”
Osiyo chempionlar ligasida yarim finalga yetib borishni istayotgan klub ikki asosiy futbolchisidan ayrildi: Server Jeparov va Temurxo‘ja Abduxoliqov. Futbolchilar Eron va Qatar klublari bilan 1,5 yillik shartnomaga imzo chekdi.
Ularning o‘rni kimlar bilan to‘ldiriladi? Ivan Nagayev “Lokomotiv” bilan xayrlashgan, Marat Bikmayev 32 yoshga qarab ketmoqda. Chempionlar ligasining yarim finaliga chiqish uchun gol urish kerak. Golni kim yoki kimlar uradi?
San’at Sharipov
Futbol agenti Server Jeparovning Eronga yo‘l olishi haqida birinchi bo‘lib ma’lum qilgan va keyinchalik bu o‘z tasdig‘ini topgandi. 15-yanvar kuni Sharipov “Lokomotiv”ning ikki futbolchisi Qatarga o‘tishi haqida aytib o‘tdi. 16-yanvar kuni Temurxo‘ja Abduxoliqovning “As-Sayliya” safiga qo‘shilgani ma’lum qilindi.
Ikkinchi futbolchi kim? Yaqin soatlar ichida “Lokomotiv” yana bir futbolchisini Qatarga kuzatsa ajab emas.
“Bunyodkor”
O‘rtoqlik uchrashuvlari uchun raqiblarni chertib-chertib tanlagan “Bunyodkor” Shotlandiyaning “Aberdin” klubiga imkoniyatni boy berdi — 1:2. “Qaldirg‘ochlar” bunga qadar Gana terma jamoasidan 0:2 hisobida yengilgan, Xitoyning “Xenan Jianye”, Saudiyaning “Al-Faysaliy” klublari bilan esa 1:1 hisobida durang o‘ynagandi. 20-yanvar kuni “Bunyodkor” Iordaniya termasiga qarshi o‘rtoqlik o‘yinida maydonga tushadi.
Bunyodkor” — “Aberdin” (Shotlandiya) 1:2
Gollar: Xayes, 2 (0:1). Javohir Esonqulov, 33 (1:1). Shinniye, 75 (1:2).
“Nasaf”
Ro‘ziqul Berdiyev stabil ushlab turgan Qarshi klubi Yevropaning kuchsiz klublarini mag‘lub etishda davom etdi. Bunga qadar Kipr va Ozarbayjon jamoalari ustidan 1:0 hisobida zafar quchgan “Nasaf”, endi Ruminiyaning “Botoshani” jamoasini shu hisob bilan mag‘lub etdi.
Nasaf” — “Botoshani” (Ruminiya) 1:0
Gol: Dragan Cheran, 34 (1:0).
“Paxtakor”
So‘nggi mavsumida kuchli to‘rtlikka ham kira olmagan “Paxtakor” 26 nafar futbolchi bilan Sharjaga jo‘nab ketdi. Oldinda klubni 4 ta o‘rtoqlik o‘yini kutib turibdi:
18-yanvar, chorshanba
“Paxtakor” — “Chanchun Yatai” (Xitoy)
25-yanvar, chorshanba
“Paxtakor” — “Krasnodar” (Rossiya)
27-yanvar, juma
“Paxtakor” — “Jilina” (Slovakiya)
29-yanvar, yakshanba
“Paxtakor” — raqib izlanmoqda…
O‘zbekcha transfer. “Loko” ikki futbolchini boy berdi, “Nasaf” ruminlarni mag‘lub etdi, “Bunyodkor” shotland klubidan yengildi 
