Феруза Жуманиёзовани ўзбек эстрадасида катта қизиқиш билан қарши олишди.  Унинг илк қўшиғи хитга айлангани рост. "Бегим, белбоғингиз боғлаб қўёйин” ёдингиздами? Хонанданинг латофати ҳам тилларда достон бўлди. "Кел, азизим”, "Ялла, ҳабиби”, "Амиго”, "Занг-занги”... кетма-кет хитлар ортидан бир неча маротаба яккахон концертларини тақдим этишга улгурди. Турмушга чиққач, ижоддан анча узоқлашган хонанда фарзанд кўриш орзуси билан овора бўлди. Оналик бахтига эришди ҳам. Бу орада бир неча йилларни йўқотган Феруза рейтинг бобида оқсоқланиб қолди. Турмуш ташвишларидан бўшагач, яна ижодга бўлган иштиёқ устунлик қилди. Кўзга яхшигина ташланадиган даражада вазн йиққан хонандани бошида у қадар қабул қилишмади. Ким танқид қилди, ким бу аччиқ ҳақиқатни унинг юзига айтишга ботинолмади...Хуллас, оғриқли ҳақиқатлардан тўғри хулоса чиқарган Жуманиёзова озиш ҳаракатига тушди. Ҳаракатда баракат деб бежизга айтишмайди. У олдинги гўзаллигига қайтишга ойлар ўтиб эришмоқда. Ижодий танаффус чоғида дилида кечган изтиробларни ичига ютди,  кўзёшларини оммага кўрсатмади. Сабр таги олтин деганларидек, у яна жўшқин ижодга шўнғиб, рейтигини тиклашга киришди. Мана, омад қуши яна унга қайтди. Янги қўшиқлар, клиплар, гастроллар – Ферузанинг иш режасини бойитди. Ҳар қандай вазиятда ҳам ким кимгадир сабабчи бўлади дейишади. Феруза ижодга қайтишида бошқа бир Ферузанинг маслаҳатларини, моддий ва маънавий кўмагини алоҳида тилга олади:

-"Арт модерн мюзик”  раҳбари Феруза Муродовага ўз миннатдорчилигимни билдираман. Бу аёлнинг самимийлиги, инсонийлиги, мардлиги, қўли очиқлиги таҳсинга арзийди. Менинг тақдиримга бефарқ бўлмагани, қўлидан келган барча яхшиликни аямаганлиги учун Феруза опанинг олдида қарздорлик ҳиссини туяман. Мана, ТВда яна клипларим намойиш этилмоқда. "Кўзларинг алдади мани” клипим мухлисларимга манзур бўлишидан умидворман. 20-май куни Исроилга учиб кетаман. Илк бор Тел-Авивда турмушга чиқишимдан олдин концерт бергандим. Мана, орадан йиллар ўтиб, яна таклиф тушди. Исроилда мухлисларим кўплигимдан хурсандман. Бу мамлакатда учта концерт беришим режалаштирилган. Хурсанд бўладиганим, бу гал Исроилга ўғлим билан бораман! Меҳри оташин мухлисларим борлиги менинг энг катта бахтим - дейди, қалби ҳаяжонга тўла хонанда.

Энди омад қушини маҳкам ушланг, Феруза! Тошкентда яна яккахон концертлар бериб, қўшиқларингизга интизор қалбларни хушнуд этаверинг! Яхши хабарлар, яхши янгиликлар кўп бўлсин!

Ж.ҲАМРОЕВ