Ko‘pchilik kino muxlislarini qiziqtirib qo‘ygan "Qo‘qon shamoli" filmi 15 noyabrdan katta ekranlar yuzini ko‘radi. Ma’lumki, bu kinofilm yaqindagina bo‘lib o‘tgan "Xalqaro hunarmandlar festivali" doirasida namoyish qilingan edi. Endi esa keng jamoatchilik uchun premerasi bo‘lib o‘tishi va katta ekranlardagi namoyishiga start berilishi arafasida. “Qo‘qon shamoli” tarixiy filmi “Dilshoh media” kinostudiyasi rahbari, prodyuser Mahmud Erkaboyev va rejissyor Dilmurod Masaidov tomonidan suratga olingan.
Unda Qo‘qon xonligining XVIII asr oxiri — XIX asr boshlaridagi ijtimoiy-siyosiy muhiti, o‘sha davr chigalliklari, Qo‘qon adabiy muhiti va Amiriy taxallusi bilan ijod qilgan Amir Umarxon hamda uning ayoli Nodiraning hayoti yoritiladi. Filmda Nodirabegim rolini yosh aktrisa Rayhon Asatova, Amir Umarxon rolini aktyor Ilhom Berdiev, Olimxon rolini esa aktyor Bobur Yo‘ldoshev ijro etgan.