21 oktabr kuni o‘zbek estradasining deyarli barcha vakillari Toshkent viloyatidagi paxta dalalaridan birida paxta yig‘im-terimida ishtirok etgani katta shov-shuvga aylanib ketgan edi.

O‘shanda O‘zbekistonda xizmat ko‘rsatgan artist Sardor Rahimxon Samarqand viloyatida ekanligi uning shaxsiy sahifasi orqali ma’lum bo‘lgan edi. Ammo u ham o‘shanda paxta dalasiga borib yig‘im-terimda ishtirok etgan.

Sardor Rahimxon bunday tashabbusdan ilhomlanib, o‘zi ham yig‘im-terim tadbirini tashkil etmoqchi ekanligi haqida xabar bergan edik. U o‘z sahifasiga bu haqda videolavha joylashtirgan edi.

Unda ijodkor 29 oktabr kuni soat 09:00 da Toshkent shahridagi “Turkiston” san’at saroyi oldiga barcha hasharda qatnashish istagida bo‘lganlarni taklif etib, hasharchilar Toshkent viloyatiga paxta terimiga borishlarini ma’lum qilgan edi.

Kuni kecha bu videolavha Sardor Rahimxonning sahifasidan olib tashlandi, ya’ni xonanda bu postni o‘chirib tashladi. Keyingi postda esa u paxta yig‘im-terimi tadbiri bekor qilinganligini ma’lum qilib, izohlar tugmasini ham o‘chirib qo‘ydi.

Qizig‘i shundaki, bu tadbirga hatto homiylar ham topilgan edi. Ular ko‘ngillilar uchun avtobus tashkil etish, ularning tushligini tashkil etish va boshqa sovg‘alar ulashishni ham mo‘ljallashgan edi. Ammo endi bularning bari bekor bo‘ldi...

Buning sababini aniqlash maqsadida Sardor Rahimxon bilan bog‘landik. Ijodkorning aytishicha, paxta terimi albatta tashkil etiladi. Faqat uning sanasi o‘zgargan...

Sardor Rahimxon ishtirokidagi paxta yig‘im-terim tadbiri qaysi sanada bo‘lishini bilishni istasangiz, saytimizni kuzatishda davom eting.

Durdona Rasulova