7 yil komada yotgan ayol o‘ziga keldi va ilk bor qizini ko‘rdi
Serbiyalik Daniela Kovachevich 2009 yilda tug‘ruq vaqtida qonga infeksiya tushishi natijasida komaga tushgandi. Oradan 7 yil o‘tgach, u koma holatidan chiqdi va ilk bor qizini ko‘rdi, deb xabar qildi “Metro” nashri.
O‘tgan yillar mobaynida Daniela vegetativ holatda ko‘zlari ochiqligicha yotgandi. Ayni vaqtda u sekin-asta o‘ziga kelmoqda. Avval qimirlamay yotgan bo‘lsa, hozir o‘tirish, gaplashish va buyumlarni qo‘li bilan ushlash orqali mustaqil harakatlar bajarmoqda. Shifokorlarning tavsiyalariga binoan, ayol miya faoliyatini yaxshilaydigan mashqlarni bajarmoqda.
Oila a’zolari, garchi oradan 7 yil o‘tgan bo‘lsada, Daniellaning ko‘rinishi o‘zgarmagani, biroz semirganini aytishmoqda.
Serbiyada insonning 7 yillik tanaffusdan so‘ng xushiga kelishi, birinchi bor uchrayotgan holat.