Turkiyaning eng yirik  megapolislaridan biri Istanbul shahridagi Beyo‘g‘li tumani Istiqlol ko‘chasida sodir etilgan teraktning ijrochisi – arab millatiga mansub ayol Ahlam Albashir Istanbul politsiyasi tomonidan qo‘lga olindi. Bu haqda mahalliy ommaviy axborot vositalari xabar berdi. 

Ko‘chaga bombani joylashtirib, o‘zi g‘oyib bo‘lgan ayol Suriya fuqarosi ekani ma’lum bo‘lgan. Suriyaning Afrin viloyati orqali Turkiyaga kirgan terrorist qo‘lga olingach, Xavfsizlik Bosh boshqarmasidan bayonot berildi.

"Bomba joylagan voqea joyiga olib keluvchi yo‘llarni kuzatgan 1200 ta xavfsizlik kamerasi tekshirildi. Ayolning voqea joyidan taksi bilan chiqib Esenler tumaniga ketgani aniqlandi. O‘tkazilgan jismoniy-texnik tekshiruvda shaxs bilan aloqada bo‘lgan 21 ta manzilda operatsiya o‘tkazildi”, deyiladi Xavfsizlik bosh boshqarmasi xabarida.

Operatsiya chog‘ida 46 kishi qo‘lga olingan va ularning hammasi tergov-surishtiruv ishlarida bombani joylagan shaxsning Kichikchekmacha tumanidagi manzilga ravona bo‘lganini ma’lum qilgan. Belgilangan manzilda soat 02:50 da olib borilgan operatsiyada voqeani sodir etgan Suriya fuqarosi Ahlam Albashir tiriklayin qo‘lga olindi.

U ko‘rsatmalarida Kurdiston Ishchi partiyasi, Xalq o‘zini-o‘zi mudofaa kuchlari va Demokratik ittifoq terror tashkilotlari tomonidan maxsus razvedka xodimi sifatida ta’lim olganligini va Afrin orqali noqonuniy yo‘llar bilan Turkiyaga kirganini tan olgan. 

U Suriyaning Kobani shahridagi yuqori nomlari keltirilgan terrorchilik tashkilotilari qarorgohidan kecha, 13 noyabr kuni portlashni amalga oshirish haqida buyruq olgani va soat 16:20 atrofida uni sodir etib, qochganini bayon qilgan. 

Ayni vaqtda ushbu holat bo‘yicha tergov davom etmoqda.