Toshkentning Olmazor tumanida xizmat vazifasini bajarayotgan IIB xodimi o‘ldirib ketilgandi. IIV matbuot kotibi uning hayotiga tajovuz qilgan fuqaro qo‘lga olinganini ma’lum qildi.

Poytaxt IIBB matbuot xizmati axborotiga ko‘ra, 30-noyabr kuni soat 00:50 larda Olmazor tumani IIO Faoliyatini muvofiqlashtirish bo‘limi profilaktika inspektori katta leytenant N.Bobomurotov tumanning “G‘alaba” mahallasiga tezkor chaqiruv bo‘yicha yetib borib, xizmat vazifasini bajarayotgan vaqtida, muqaddam sudlangan, 1992-yilda tug‘ilgan fuqaro B.Z. xodimning hayotiga tajovuz qilib, voqea joyidan yashiringan.IIV xabarida aytilishicha, olib borilgan tezkor-qidiruv tadbirlari natijasida IIB profilaktika inspektori hayotiga tajovuz qilgan fuqaro qo‘lga olinib, protsessual tartibda chora ko‘rish uchun prokuratura organlariga topshirildi.

Holat yuzasidan Toshkent shahar prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan.