Jeyms Bond haqidagi yangi filmning yakuniy treyleri paydo bo‘ldi
Sony Pictures Entertainment kinokompaniyasi YouTube’dagi o‘z kanalida britaniyalik maxsus agent Jeyms Bond haqidagi “007: Spektr” filmining yakuniy treylerini e’lon qildi. Bu haqda “Korrespondent.net” xabar bermoqda.
75 soniyalik rolikda aktyor Deniel Kreyg ijrosidagi Bondning “Spektr” jinoiy tashkilotiga qarshi kurashi tasvirlangan. Agent bir necha bor Frants Oberxauzer bilan to‘qnash keladi — mazkur rolni avstriyalik aktyor Kristof Valts ijro etgan.
Sahnalarning birida Bond vayron bo‘layotgan bino bo‘laklaridan omon qoladi, keyin esa qorli tog‘lardagi, shuningdek, turli aviatexnikalardagi quvlamachoqlarda qatnashadi.
“007: Spektr” filmi 26-oktabr kuni jahon ekranlariga chiqadi. Lenta bondiananing Kreyg ishtirokidagi to‘rtinchi va rejissor Sem Mendes rahbarligida ikkinchi film hisoblanadi. Franshizaning avvalgi kartinasi — “007: Skayfoll” jahon bo‘ylab 1,1 milliard dollar to‘plab, Bond haqidagi eng muvaffaqiyatli kinoga aylangan edi.
Jeyms Bond haqidagi yangi filmning yakuniy treyleri paydo bo‘ldi 
