Тарих қатларидан жой оладиган яна бир учрашув якунига етди. Испан футболи ҳар сафар класикоси билан ўзгача бўлган, бугун мухлислар мана шу ўзгача баҳсдан яна бир бор баҳра олишга муваффақ бўлдилар.

Класико эса ўз номига яраша классик ўйин бўлди. Аввалги учрашувларда ҳам бўлиб келгани сингари "Реал” анъанавий тарзда ўйин бошида ташаббусга эга бўлишга интилди. Шунга монанд мадридлик футболчиларда ҳам бир қатор имкониятлар юзага келди. Аввалига Бэйл тўғри зарба бера олмаган бўлса, 11-дақиқада уюштирилган тезкор қарши ҳужумдан сўнг Карим Бензема Ди Марияни қулай вазиятга чиқариб юборди ва аргентиналик футболчи сўнгги зарбани беришда адашмади. 1:0.

Шундан сўнг "Барселона” ҳарчанд вазиятни ўнглашга уринмасин, мадридликлар ҳимояси бўш келай демасди. Фақат 68-дақиқада бурчак тўпидан сўнг Марк Бартра бош билан гол киритишга муваффақ бўлди. Шундан сўнг ўйинда устунлик тўлиғича "Барселона” томонига ўтди. Каталонияликлар бир, икки, уч, керак бўлса тўртта ҳам гол уришлари мумкин эди, аммо бу ишни уларнинг ўрнига Гарет Бэйл амалга оширди.

"Реал” учун имкон деярли қолмагандек кўринган ва Карло Анчелотти жамоаси ҳимояси инқирозга учраши аниқдек кўриниб қолган лаҳзаларда, аниқроғи 85 дақиқада Иско ўнг қанотдан Гарет Бэйлни олдинга бошлади. Бу вазиятда ҳимоячи елка билан Бэйлга қарши яхши ўйин кўрсатди ва уни туртиб, майдон ташқарисига чиқариб юборди ҳам. Гарет нима сабабдан 100 миллион еврога баҳоланганини мавсум давомида исботлай олмаган бўлиши мумкин, аммо ўша вазиятда биргина уриниш билан барча шубҳаларни тарқатиб юборган бўлса не ажаб. Уэльслик футболчи шу қадар тез югурдики, бунақаси фақат Усейн Болтнинг қўлидан келса керак. Натижа эса Каталония учун аламли якунланди – 2:1.

Сўнгги дақиқаларда Хави Неймарни ажойиб пас билан бирга бир вазиятга чиқариб юборган эди, аммо бразиялик футболчининг зарбаси дарвоза устунига тегиб қайтди. Бу эса Мадридда байрам бошланишидан далолат эди...
 
Испания Кубоги, Финал
Барселона – Реал Мадрид 1:2 (0:1, 1:1) 
Голлар: 0:1 – 11 Ди Мария, 1:1 – 68 Бартра, 1:2 – 85 Бэйл. 
Барселона – Хосе Пинто, Альба (Адриано, 46), Бартра (Санчес, 86), Маскерано, Дани Алвес, Хави, Фабрегас (Педро, 60), Бускетс, Иньеста, Неймар, Месси. 
Реал Мадрид – Касильяс, Рамос, Карвахаль, Пепе, Коэнтрау, Иско (Каземиро, 89), Бэйл, Ди Мария (Ильярраменди, 86), Алонсо, Модрич, Бензема (Варан, 90). 
Огоҳлантиришлар: Иско (3), Неймар (17), Пепе (17), Маскерано (53), Алонсо (88).

Манба: www.uff.uz