Joriy haftaning birinchi yarmida O‘zbekistonga Kaspiy dengiz hududlaridan nam va nisbatan sovuq havo massalari kirib keladi. Bu haqda Gidrometeorologiya xizmati markazi xabar berdi.

O‘zbekiston bo‘yicha vaqti-vaqti bilan yomg‘ir yog‘ib, tog‘oldi va tog‘li hududlarda qor yog‘ishi mumkin.

Bugun va ertaga ayri hududlarda tuman tushishi mumkin. 25 oktyabrda shimoliy hududlarda, 26 oktyabrda esa respublika hududining katta qismida shamol 15-20 m/s.gacha, hatto 23-25 m/s.gacha kuchayishi mumkin hamda chang to‘zonlari kuzatiladi.

Harorat foni ushbu kunlarning o‘rtacha ko‘p yillik qiymatlaridan 1-2 darajaga past bo‘ladi va kechalari harorat +5…+8 daraja, kunduzi esa +12…+15 darajani tashkil qiladi. 25 oktyabrda ba’zi joylarda havo harorati +17...+20 darajagacha yetadi.

Ish haftasining oxiriga kelib, respublika hududi bo‘yicha nisbatan quruq va iliq ob-havo kuzatiladi. Harorat kechasi +3…+8 daraja, kunduzi esa +14…+19 daraja atrofida bo‘ladi.