Ozarbayjon Yevropada Rossiyaning o‘rnini egallamoqchi. Aliyevning niyatlari katta
Ozarbayjon Yevropaga gaz eksportini sezilarli darajada oshirishni rejalashtirmoqda. Bu haqda mamlakat rahbari Ilhom Aliyev kecha, 6 oktyabr kuni Pragadagi Yevropa siyosiy hamjamiyatining sammiti yakunlari bo‘yicha Ozarbayjon telekanallariga bergan intervyusida ma’lum qildi.
Uning ta’kidlashicha, dunyodagi hozirgi geosiyosiy vaziyat Ozarbayjon resurslariga talabni keskin oshirgan.
“Yevropa Ittifoqi bilan imzolangan memorandumga asoslanib, yaqin yillarda Yevropaga gaz eksportini kamida ikki barobarga oshirishni rejalashtirmoqdamiz. Ya’ni, o‘tgan yili 9 milliard kub metr bo‘lgan bo‘lsa, 2027 yilda kamida 18 milliard kub metr, balki undan ham ko‘proq bo‘lishi mumkin”, deydi Aliyev.
Uning so‘zlariga ko‘ra, respublika yangi gaz konlarini o‘zlashtirishga kirishmoqda. Shu bilan birga, mavjud konlarda ishlab chiqarish ko‘paytiriladi.
“Qolaversa, Ozarbayjonda qayta tiklanadigan energiya manbalaridan foydalanish katta miqdorda tabiiy gaz zaxiralarini yaratadi”, deydi Ilhom Aliyev.
Prezidentga ko‘ra, Baku gazdan tashqari Yevropaga neft va elektr energiyasini eksport qilishni davom ettiradi.
“Ozarbayjon Yevropa uchun, nafaqat Yevropa, balki butun dunyo uchun juda muhim strategik energiya hamkoriga aylanadi”, deydi u.
Yil oxirigacha Baku Yevropa Ittifoqiga 12 milliard kub metr gaz yetkazib berishni va’da qilmoqda.
2022 yil oxirigacha Ozarbayjon Yevropa Ittifoqiga 2021 yilga nisbatan 30 foizga ko‘proq tabiiy gaz yetkazib berishni rejalashtirmoqda. Respublika Energetika vazirligi ma’lumotlariga ko‘ra, 2022 yilda Yevropaga yetkazib berishning umumiy hajmi 12 milliard kub metrni tashkil qiladi.
Ozarbayjon bilan bir qatorda Yevropadagi energetika inqirozi fonida Yevropa Ittifoqiga gaz yetkazib berishni Isroil ham oshirishni rejalashtirmoqda. Isroil Bosh vaziri Yair Lapidning so‘zlariga ko‘ra, mamlakat Yevropa Ittifoqiga 2021 yilda Yevropa Rossiyadan oladigan gaz miqdorining taxminan 10 foizini yetkazib bera oladi.
Hozirda Yevropa gaz bozorida tub o‘zgarishlar ro‘y bermoqda. Rossiyaning Ukrainaga bo‘lgan tajovuzkorligi va Rossiya va G‘arb davlatlari o‘rtasidagi sanksiyalar qarama-qarshiligi natijasida Yevropaga ko‘k yoqilg‘i yetkazib berish sezilarli darajada kamaydi.
Yevropa Ittifoqi davlatlari Yevropa, Osiyo va Amerikadagi yangi yetkazib beruvchilarga yo‘naltirilmoqda. Bundan tashqari, suyultirilgan gazdan foydalanishni kengaytirish, fuqarolar va sanoat korxonalari tomonidan gaz sarfini tejash, shuningdek, gaz bilan ishlaydigan elektr stansiyalari faoliyatini to‘xtatish kabi choralar ko‘rildi.
Ozarbayjon Yevropada Rossiyaning o‘rnini egallamoqchi. Aliyevning niyatlari katta 
