"Barselona”ning 37% ishqibozi Sport.es portalida o‘tkazilgan so‘rovnoma vaqtida klub hujumchi Lionel Messini sotishi kerak, degan fikrni bildirdi, deb xabar bermoqda "Kun”.

"Barselona” muxlislarining fikricha, ushbu mavsum bor-yo‘g‘i Ispaniya Superkubogini qo‘lga kiritgan jamoaning joriy mavsumdagi muvaffaqiyatsizliklariga aynan argentinalik hujumchi aybdor.

Ishqibozlar, bundan tashqari, darvozabon Xose Pinto (92% ovoz), himoyachilar Dani Alves (81%) va Xaver Maskerano (53%), yarim himoyachi Aleks Song (59%) va hujumchi Aleksis Sanches (21%) ham jamoadan ketishi kerak, degan fikrni bildirdi.

Messi 2013/2014-yilgi mavsumda "Barselona” tarkibida 46 ta rasmiy uchrashuvda maydonga tushib, 41 ta gol urishga muvaffaq bo‘ldi. 16-may kuni "Barselona” 26 yoshli hujumchi bilan yangi shartnoma imzolaganini e’lon qildi. Yangi bitim bo‘yicha Messining yillik maoshi 20 million yevroni tashkil etadi.