Қайд этиб ўтамиз, ўтган ойда Ўзбекистон миллий терма жамоаси 67-ўринни эгаллаган эди. Ҳозир жамоанинг очколари 555 тани ташкил этиб, у 56-поғонага кўтарилиб олди. Мазкур натижадан сўнг, Ўзбекистон Эрон терма жамоасидан рейтингда ўзиб кетди ҳамда 2007 йилнинг июнь ойи рейтингидан бери илк бора Осиёнинг энг кучли 4 жамоаси қаторига кирди. 

Эслатиб ўтамиз, Ўзбекистон терма жамоаси 2006 йилнинг ноябрь ойи рейтингида 45-ўрингача кўтарилиб, Осиёнинг энг кучли терма жамоалари орасида кучли учликка кира олган эди.

Япония терма жамоаси ҳамон Осиё қитъасининг энг кучли терма жамоаси бўлиб турибди (21). ЖЧ-2014 саралаш баҳсларидаги гуруҳдошимиз Жанубий Корея терма жамоаси бу ойги рейтингнинг 31-поғонасидан жой олган бўлса, Австралия терма жамоаси 36 ўринни эгаллаган. МДҲ мамлакатлари орасида эса Ўзбекистон Россия (9) ҳамда Украина (44) терма жамоаларидан кейинги ўринда турибди.

ЖЧ-2014 саралаш босқичи доирасидаги Ўзбекистоннинг қолган иккита рақиби – Қатар ва Ливан терма жамоалари ФИФА рейтингида пастлаган. Қатар терма жамоаси ўтган ойги рейтингдан 8 поғона пастга тушиб 106 ўринга жойлашган бўлса, Ливан терма жамоаси яна 3 поғона пастлаган ҳолда 130 ўриндан жой олган.

Умумий рейтингнинг кучли ўнлигида ўзгариш юзага келмади. Рейтингда ҳамон Испания терма жамоаси етакчилик қилмоқда, дея хабар беради ЎФФ матбуот хизмати.

Терма жамоаларнинг умумий рейтинги билан ФИФА расмий сайтида танишишингиз мумкин.