Janubiy Afrika respublikasida 16 yoshli o‘quvchi maktabda avvaliga sinfdoshini, so‘ng o‘zini otib tashladi. Bu haqda “Korrespondent.net” xabar berdi.

Otishma Gauteng provinsiyasi Deyviton shahridagi o‘rta maktabda oflayn darslar qayta boshlangandan bir kun o‘tib sodir bo‘lgan. Qurbonlarning ikkalasi ham 10-sinf o‘quvchilari.

Voqea 12-dekabr kuni yuz bergan, ammo keyingi kunga qadar xabar berilmagan. Hozirda politsiya otishma sabablari va holatlarini o‘rganmoqda. Vaziyat bilan ishlash uchun maktabga psixologlar yuborilgan.

Dekabr boshida AQShdagi maktabda 15 yoshli o‘quvchi otishma sodir etgandi. Hodisada 3 kishi, 14-17 yoshli maktab o‘quvchilari halok bo‘lgan.

18-oktabr kuni Rossiyaning Perm shahri yaqinidagi Sars qishlog‘ida 12 yoshli o‘spirin maktabga ov karabini (qisqa stvolli miltiq) bilan kelib, o‘t ochgandi. Hodisa darslar boshlanishidan oldin yuz bergan, uning natijasida hech kim jabrlanmagan. Hujumchi qo‘lga olingan.

Eslatib o‘tamiz, 20-sentabr kuni Perm davlat milliy tadqiqotlar universiteti talabasi Timur Bekmansurov oliygoh hududiga miltiq bilan kirib, yo‘lida uchragan odamga o‘q uza boshlagan. Hodisa tufayli talabalar derazalardan tashqariga sakragan. Ko‘pchilik o‘z sinfxonasida barrikadalar qurib o‘ralib olgan. Hujumchi kamida 30 marta o‘q uzgan, taxminlarga ko‘ra, o‘qlar Huglu 12 kalibrli silliq stvolli quroldan otilgan. Oqibatda olti kishi halok bo‘lib, 43 kishi jabrlangan.