Mutaxassislarnig fikriga ko‘ra, ayni paytda jahon miqyosida global muammoga aylanib ulgurgan koronavirus epidemiyasi faqat havo-tomchi yo‘li orqali yoki virus yuqtirgan inson bilan muloqot qilganda yuqmas ekan. Xitoy Sog‘liqni saqlash milliy komissiyasi ma’lumotlariga ko‘ra, zamonaviy smartfonlar ham virus tashuvchi vosita bo‘lishi mumkin.

Soha mutaxassislarining izohiga ko‘ra, smartfonlar tashqi qoplamasi, shunigdek, ularning displey qismida juda ko‘p miqdorda chang, bakteriya, so‘lak va hatto, boshqa virus tashuvchi turli moddalar to‘planib qolar ekan. Odatda bunday qurilmadan foydalanuvchilar qo‘llari yordamida o‘zining shilliq qavatli tana a’zolariga (labi, burni va ko‘ziga) teginsa, virus o‘tishi ehtimoli yuqori bo‘ladi.

Shunga ko‘ra, mutaxassislar Chin yurti vakillariga o‘zlari foydalanadigan smartfonlarni dezinfeksiya qilishni tavsiya etyapti. Ularning ta’kidlashicha, smartfondan koronavirus xavfini oldini olish uchun qurilmani 56 darajali haroratda 30 daqiqa davomida qoldirish yetarli. Bunday haroratda telefonning sifati buzilmasligi faqat uning modeliga bog‘liq.

Darvoqe, yuqoridagi tavsiyadan tashqari, dezinfeksiya uchun vodorod peroksidi, sirka kislotasi (uksusnaya kislota) yoki xloroform yordamida yaxshilab artish ham smartfonni koronavirusdan bartaraf etadi.

Shuningdek, Szilin universiteti Birinchi shifoxonasi umumiy meditsina bo‘limi bosh shifokori In Xunmey smartfonni tozalashni yana bir oddiy yo‘lini maslahat berdi. Uning aytishicha, qurilmangizni koronavirus xavfidan tozalash uchun 75 foizlik spirt bilan yaxshilab artsangiz ham kifoya qilar ekan.