Yangi iPhone 6 smartfoni O‘zbekistonda 5,5 million so‘mdan sotuvga chiqdi
Apple iPhone 6 smartfonining 16 Gb ichki xotiraga ega turi Toshkent shahridagi “Fleshka” savdo majmuasida 20-sentabrdan boshlab sotilmoqda. Bu haqda do‘konning Facebook’dagi sahifasi xabar berdi, deb yozadi “Parol” nashri.
Yangi smartfonning Space Gray (to‘q kulrang) va Silver (kumush) rangli turlarini savdo majmuada 5 550 000 so‘mdan sotib olish mumkin. iPhone 6 Plus planshetofoni va iPhone 6 smartfonining boshqa xotirali turlari yaqin kunlar ichida sotila boshlanadi.
Eslatib o‘tamiz, smartfonlarning 16, 64 va 128 Gb ichki xotiraga ega turlari mavjud. iPhone 6 smartfoni 4,7 dyuym, iPhone 6 Plus esa 5,5 dyuymli displeyga ega.
Yangi iPhone 6 smartfonlari 19-sentabrdan boshlab Avstraliya, Buyuk Britaniya, Germaniya, Gongkong, Kanada, Puerto Riko, Singapur, AQSh, Fransiya va Yaponiyada sotila boshlangan edi. Shuningdek, avstraliyalik ilk iPhone 6 xaridorlaridan biri yangi smartfonini qo‘lidan tushirib yuborishga ham ulgurdi.