Samarqandning “Dinamo” klubi sobiq a’zosi Sirojiddin Sayfiyevning saraton kasalligiga chalingani ma’lum qilingandi. Keyinroq bloger Farhod Norbo‘tayev uning so‘nggi 1 yilda boshdan kechirganlari haqida post yozdi.

Ma’lum qilinishicha, postni e’lon qilish 2015-yildayoq rejalashtirilgan biroq futbolchining o‘zi buni istamagan. Sayfiyev saraton sabab o‘lim bilan kurashayotganini eshitgach esa bloger futbolchidan kechirim so‘rab, uni omma uchun ochiq qilgan.
“

2015-yilning 24-oktabr kuni Toshkentda “Lokomotiv”ga qarshi kechgan o‘yin Sirojiddin uchun professional faoliyatidagi so‘nggisi bo‘ldi. O‘sha o‘yinda u “Dinamo” uchun borini berib o‘ynadi. Ammo 84-daqiqada sodir bo‘lgan o‘sha mashum voqea hayotini tubdan o‘zgartirib yubordi.

Alam qiladigani shundaki, jarohatdan so‘ng tez tibbiy yordam mashinasida uni poytaxtdagi “Travmatologiya va ortopediya respublika ilmiy tekshirish instituti” shifoxonasiga olib kelishdi. Biroq futbolchining ortidan “Dinamo” klubi rahbariyatidan hech kim bormadi.

Futbolchi shunday hikoya qilgandi: “Oyog‘im singan. Og‘riqqa chiday olmayman. Operatsiya bo‘lishini to‘rt soat kutib yotdim. O‘sha paytda faqatgina jamoadoshim Zayniddin Tojiyev mening yonimda turdi. Buning uchun Zayniddin akaga katta rahmat aytaman”.

“Operatsiyadan so‘ng qarasam, palatadagi shkafchada pul turibdi. Otamga hech kimdan pul so‘ramang, klub oyligimni bersa, hamma xarajatlarga yetadi deb aytgandim. Ammo otamning qarshiligiga qaramay, Artur Gevorkyan va boshqa ko‘plab futbolchilar sog‘ayib ketishim uchun pul tashlab ketishgan ekan”.

Ana shunday qiyin ahvolda qolgan paytda klub Sirojiddin Sayfiyevning oyligi tugul, jarohat olganda to‘lanishi lozim bo‘lgan pulni ham bermadi. Unga ajratilgan sug‘urta pulini eshitib ochig‘i kulishni ham, yig‘lashni ham bilmay qoldim. Atigi 174 ming so‘m.

Farhod Norbo‘tayev, bloger

Blogpostda futbolchining keyingi hayoti, Samarqand klubi rahbarlarining qilmishlari hikoya qilingan. Bunday o‘zboshimchalik qachongacha davom etadi qabilida savollar yog‘dirilgan.
“

Oylik maoshini olish maqsadida Toshkentdan Samarqandga kelgan Sirojiddin bilan har safar ko‘rishardik. Uchrashuvlarning birida u hamon pullarini ololmay halak bo‘lib yurganini, oxirgi chora sifatida O‘zbekistonning birinchi Prezidenti Islom Karimovga murojaat qilganligini aytib berdi. Aynan shundan so‘ng paytavasiga qurt tushgan “Dinamo” klubi rahbariyati unga oylik maoshi va mukofot pullarini berishni va’da qilgan. Hatto, aniq sanasini aytib, o‘sha kuni barcha pullarini berishni aytishgandi. Aytilgan muddat uch-to‘rt marotaba o‘zgardiki, u pullarini ola bilmadi. Vaholangki, 2012-yilgi futbolchining klub bilan tuzgan shartnomasida u mashg‘ulot yoki o‘yin jarayonida jarohat olsa, ish haqqi yuz foiz to‘lab berilishi keltirib o‘tilgan.

Farhod Norbo‘tayev, bloger

Blogerning qayd etishicha, vaziyat shungacha borganki, sobiq futbolchi Samarqand klubi rahbariyati bilan ko‘rishib, ortga bor-yo‘g‘i 2000 so‘m bilan qaytgan. Chunki unda pullarini olish uchun umid bo‘lgan va Samarqandga borgan. Ma’lum qilinishicha, “Dinamo”ning Sirojiddin Sayfiyevdan 60 million so‘m qarzi bor.
“

Og‘ir ahvolda qolgan futbolchi to‘liq sog‘ayib ketishi uchun mablag‘ kerak. Shu maqsadda klubda qolib ketgan oylik maoshlari va mukofot pullarini olish maqsadida O‘zbekiston Prezidenning virtual qabulxonasiga murojaat qilmoqchi edi. 31-mart kuni virtual qabulxonaga yubormoqchi bo‘lgan shikoyat xatini tahrir qilish maqsadida menga yuborishini aytgandi. Afsuski, o‘sha kungi suhbatimizdan so‘ng Sirojiddin bilan boshqa gaplashish imkoni bo‘lmadi. 4-aprel kuni esa internet tarmog‘ida uning og‘ir xastalikka chalinganligini haqidagi noxush xabarni eshitdim.

Nahotki “Dinamo” klubi rahbariyati “o‘ziga xon ko‘lankasi maydon” bo‘lib qolgan bo‘lsa? Axir har yili klubga 5—7 milliard so‘m mablag‘ ajratiladi-ku? Ajratilgan shuncha mablag‘ futbolchilarga berilmagan bo‘lsa, qayerga sarflangan?

Farhod Norbo‘tayev, bloger

Ma’lumot uchun, avvalroq “Championat.asia” nashri “Dinamo” klubining Sirojiddin Fayziyevdan 70 millionga yaqin qarzi borligi haqida aytgandi.