25-mart kuni O‘zbekistonda xizmat ko‘rsatgan artist Sevara Nazarxon "Shanson” radiosining "Jivaya struna” ("Живая струна” — "Jonli tor”) dasturida mehmon bo‘ladi. Bu haqda "Shanson” nashri xabar berdi.

Yoqimli va kuchli ovozi bilan ham sharq qo‘shiqlarini, ham Lara Fabian shansonini, ham Uitni Hyuston soul-xitini bir xilda yaxshi ijro etadigan nozik o‘zbek go‘zali yaqin vaqtgacha faqatgina tor doiradagi muxlislarga tanish edi. Biroq "Golos” teleshousidagi ishtiroki unga katta mashhurlik olib keldi, — deyiladi xabarda.

Xabarda ta’kidlanishicha, "Jivaya struna” dasturida Sevara nafaqat o‘zining xit qo‘shiqlarini ijro etadi, balki yangi ashulalarini ham radio tinglovchilariga taqdim etadi. Ushbu dasturni muxlislar "Shanson” to‘lqinlarida tinglashi yoki radio saytida jonli videotranslyatsiyani tomosha qilishi mumkin.

Eslatib o‘tamiz, Sevara Nazarxon ushbu radio tomonidan tashkillashtiriladigan "Yil shansoni” mukofotiga nomzod bo‘ldi. U 2014-yil 5-aprel kuni Kreml Saroyida o‘tkaziladigan "Yil shansoni” mukofotining taqdirlash marosimida ishtirok etadi.