Facebook 30 yoshdan oshgan ayollar uchun xavfli deb topildi
Yangi Zelandiyaning Oklend universiteti tadqiqotchilari Facebook ijtimoiy tarmog‘i 30—40 yosh oralig‘idagi ayollar uchun xavfli ekanligini aniqladi. Bu haqda “Vesti.ru”xabar bermoqda.
Tadqiqotda 18—49 yosh oralig‘idagi 11 ming kishi ishtirok etgan bo‘lib, ishtirokchilarning 62,5 foizi ayollar edi. Tadqiqotda qatnashgan respondent ayollarning aksariyati (69 foizi) Facebook’da sahifasi borligini, 58 foizi esa so‘nggi bir hafta davomida ijtimoiy tarmoqqa kirganini ma’lum qilgan.
Ma’lum bo‘lishicha, Facebook ijtimoiy tarmog‘idan erkaklardan ko‘ra ayollar ko‘proq va faolroq foydalanadi. Shuningdek, tadqiqot davomida ayniqsa 30—40 yosh oralig‘idagi ayol-respondentlar o‘z tashqi ko‘rinishidan ko‘ngli to‘lmasligi aniqlandi.
Ayniqsa, Facebook ijtimoiy tarmog‘idan foydalanuvchi ayollar orasida o‘z jozibadorligiga bo‘lgan ishonch 30 yoshga borib keskin tushib ketadi. Facebook’ka kirmaydigan ayollar esa bu muammo haqida nisbatan kamroq qayg‘uradi. 50 yoshlarga borib esa Facebook’da sahifasi bor ayollarda ham, sahifasi yo‘q ayollarda ham o‘ziga bo‘lgan ishonch yana yuqorilashni boshlaydi.
Tadqiqot muallifi Samanta Strongning ma’lum qilishicha, ayollarda o‘z tashqi ko‘rinishiga ommaviy axborot vositalari ta’siri ostida baho berishga moyillik bor. “Mazkur tadqiqot ijtimoiy tarmoqlar ham ayollarga xuddi shunday ta’sir qilishini ko‘rsatib berdi”, — dedi tadqiqotchi.
Facebook 30 yoshdan oshgan ayollar uchun xavfli deb topildi 
