Xitoyning Guanchjou viloyatiga qarashli kasalxonalardan birida ikkita sun'iy intellektga ega robot koronavirus yuqtirgan bemorlarga xizmat ko'rsata boshladi. Robotlar rasman 29 yanvar kuni ish boshlagan. Ular bemorga dorilarni, ovqatni o'z vaqtida yetkazib bermoqda. Bundan tashqari, bemorning karavotidagi eskirgan choyshablarni yangisiga almashtirishda ham asqotmoqda. Mutasaddilarning aytishicha, shunday qilinsa, birinchidan, tibbiyot xodimlarining jismoniy zo'riqishi kamayadi, ikkinchidan, ularning virus yuqtirish xavfi deyarli yo'qqa chiqadi.

— Bu robotlar eshiklarni mustaqil ocha oladi, — deydi kasalxona vrachlaridan biri. — Liftda o'zi mustaqil harakatlanadi. Har qanday to'siqlardan o'zini olib qocha biladi. Asosiysi, tez harakatlanadi. Yana robotlar bemorning tibbiy kartasini o'qiydi, ma'lumotlar bazasini tuza biladi.

Ma'lumot o'rnida aytib o'tamiz, Xitoyda hozirga qadar koronavirus tufayli 260 kishi halok bo'ldi. 253 kishi to'liq davolanishga erishdi. Ammo achinarlisi, virus yuqtirganlar soni ortishdan to'xtamayapti.