“Forsaj-10” filmining suratga olish jarayonlariga qancha mablag‘ sarflanishi ma’lum qilindi, deb xabar bermoqda “Film.ru” nashri.

Manbalarga ko‘ra, Universal studiyasi film uchun taxminan 340 million dollar ajratgan. E’lon qilingan qiymat 2021-yilda katta ekranlarga chiqqan “Forsaj-9”  budjetidan 70 foizga qimmatroq. Narxlarning oshishiga inflyatsiya, pandemiya, Dominik Toretto rolini ijro etgan aktyor Vin Dizel va uning hamkasblari: Mishel Rodriges, Bri Larson, Jeyson Momoa, Sharliz Teron, Jon Sina va Jeyson Steytemning maoshi oshgani sabab bo‘lishi mumkin.Bahorda “Forsaj” filmining rejissori o‘zgardi: bu loyihaga boshchilik qilayotgan Jastin Lin aktyor Dizel bilan kelishmovchiliklar tufayli suratga olish jarayonlarida loyihani tark etdi. Studiya uning o‘rniga “Aldov illuziyasi” filmi rejissori Lui Leteryerni ishga oldi.

“Forsaj-10” filmi 2023-yilning 19-may sanasidan boshlab kinoteatrlarda namoyish etilishi rejalashtirilgan. Tasdiqlanmagan ma’lumotlarga ko‘ra, filmning bu qismi “Forsaj” kinokartinalari orasidagi eng qimmat qismi bo‘ladi. Filmning barcha qismlari 2001-yildan buyon 6,6 milliard dollar mablag‘ yig‘gan. “Forsaj” filmining so‘nggi, ya’ni 11-kinokartinasi 2024-yilda katta ekranlarga chiqadi.