Apple kompaniyasi o‘zining aqlli soatini keyingi yilning kuzida taqdim etadi, deya xabar bermoqda LookAtMe nashri.

Xitoyning C Technology kompanyasi vakillarining ma’lum qilishicha, Apple kuzgi taqdimotlarining birida ushbu yangi qurilmani iPhone 6 bilan birga namoyish qilishi mumkin.

Yana shu narsa ma’lum bo‘ldiki, iWatch prototiplaridan biriga 100 mAh hajmidagi akkumulyator o‘rnatilgan. C Technology mutaxassisining fikricha, bu soatning to‘laqonli ishlashi uchun yetarli emas. Taqqoslash uchun, Samsung Galaxy Gear smart-soatining akkumulyatori hajmi 315 mAh ni tashkil etadi. Shunda ham to‘la quvvat bor-yo‘g‘i 4—5 soatga yetadi.

Biroq, Apple simsiz quvvat beruvchi qurilma ustida ishlayotgan bo‘lishi, u akkumulyatorning kichik hajmli ekanini sezdirmasligi ham mumkin, deya qayd etdi mutaxassis.

Mish-mishlarga ko‘ra, iWatch’ning ayollar va erkaklar uchun mo‘ljallangan alohida talqinlari chiqarilishi mumkin. Ular ekranining diagonallari tegishli ravishda 1,3 va 1,7 dyuymni tashkil qiladi. Shuningdek, smart-soat maishiy texnika bilan o‘zaro "aloqaga kirisha olishi” taxmin qilinmoqda.

Manba:daryo.uz